Monday, October 29, 2012

මගේ කඳුල........

ඇවිද යමි
පිණි දිය පෙඟවූ
බෝමළුවේ
නිරුවත් දෙපා
සිඹ සනහන

ඉවකරමි
පන්සල් වත්ත
පුරා විහිදුනු
නාමල් පුසුඹට
සිත සනසවන

රැගෙන යමි
සේපාලිකා මලක්
මං තනියෙම
මල්අසුනක
පුදකරන්න

පැදකුණු කරමි
මුමුණමින්
මිදෙන්නට
සසර මඟ
‍සොවින් පිරුන

දිග හැරියෙමි
බුදු  පාමුල
ගුලිකරගත්
මගේ කඳුල
නුඹේ නමට
හඬා වැටුන



Wednesday, October 10, 2012

හිතාදර සඳ රාජිණී.....

සිහදහස් රැහැයියන් කළුවරට පෙම් බැඳන්
තරු එක්ක දොඩමළුව රාත්‍රිය ආදරෙන්
සඳළුතලයේ කෙනෙක් ඇහැර හුදකලාවෙන්
බිනර මල රාත්‍රියෙ සුවම සුව නින්දකින්

තරු කැකුළු අසාපන්...කළුවරට ඉඩදියන්
බිනර සඳ අසාපන්..නුඹෙ එළිය නිවාපන්
මගෙ බිනරි සුදු වළාකුළු අතර වෙලාපන්
තනිය නැති කරන්නට සඳ සාවි එවාපන්

කොඳ කුසුම් යහන වට පිළිවෙලට එතීලා
පිණි බිංදු මත ස‍ඳේ මෘදු කිරණ වැටීලා
ඒ දසුන දෙව් ලොවක අසිරි සිරි මවාලා
මගේ රෝස මල් කුමරි රෑ කාලේ පිපීලා

සඳළුතලයේ කෙනෙක් ගඟන මත නෙත් තබන්
තරු කැකුළු නිවාලා සඳුට දුක පවසමින්
අසාඉන් බිනර මල...... නුඹ නැතිව පාළුවෙන්
ගඟන මත නොපායන
මිහිකතේ නැඟී එන
නුඹට ආදරෙ පුදන
මමයි නුඹෙ බිනර සඳ.........


මගේ යාළුවාගේ තඩි බෝල අකුරු වලින් හැඩ වුන ලස්සනම ලස්සන ලිපියක් සැප්තැම්බර් 28 වෙනිදා උදේ පාන්දර මට ලැබුනා. ‍ඒ ලිපියෙ තිබුන කවි ටික තමයි ඔය උඩින් තියෙන්නෙ....
ඇය රාත්‍රි වැඩමුරයත් මම උදේ වැඩමුරයටත් යෙදිලා හිටපු පහු ගිය සතියට කලින් සතියෙ ඇත්තටම අපි දෙන්නටම ජීවිතේ උදා වුන තවත් එක සතියක් විතරක්ම නොවුන නිසා, ඇයට මාව කෙසේ වෙතත් මට ඇගේ සෙවනැල්ල ගොඩක්ම ඕන උන සතියක් නිසා ඇගේ අඩුව මට බොහොම දැනුනා...ඇයට කියන්නට තිබූ බොහෝ දෑ මම තනිවම හිතේ හිර කරන් හිටියා....
ඒ හින්දම වෙන්න ඇති එදා මේ කවි ටික මම කදුළු හල හල කියෙව්වෙ
මගේ ආදරණීය බිනර සඳ හැමදාමත් කියනවා වගේ ඔයා මගේ සංසාරගත මිතුරිය
හැමදාමත් මගේ ළඟ ඉදීවියි මගේ ප්‍රාර්ථනාව........

Monday, September 24, 2012

මගේ උපන්දිනයට ලැබුනු ආදරණීයම තෑග්ග

මේ තෑග්ග මට ලැබුණෙ නම් ගිය අවුරුද්දෙ

20110920

ගාලු මුවදොර 
රෝහලේ තිඹිරිගෙයි
සොඳුරු නිමේෂෙක
වේදනා බිඳ රෝස දෙතොලින් 
සලා නැඟූ හඬ තාම මතකයි
අවුරුදු 23කින් ඉක්බිති
ඔබ, සතුට දුක එකට හිඳ 
බෙදාගත් දිරිය දියණියයි
ඉදිරි දිවි ම‍‍ඟෙහි 
සුවහසක් වාසනා මල් පිපේවා...!
පතන්නේ 
සදාදර අම්මා.

මේ අවුරුද්දෙත් මට ලැබුන ඒ වගේම තෑග්ගක්

20120920

ආදරණීය දියණියේ,

සුසුමක් මැදින් ලද
කුසුමක් විය ඔබ
මගේ හිරු ඔබයි
මගේ සඳු ඔබයි
අහස් ගැබ මමයි නම්
ඒ අහසේ
හිරු, සඳු හා තරුද ඔබයි
ඔබ දිනූ දා අප ‍ලොවට
හිරු පායා ආවා සේ
ලොව එළිය කරනා
මිණි පහනක් වන්න ඔබ
එයයි ආදරණීය පැතුම 
ඔබ දිනූ දා....

සදාදර අම්මා.


පඃලිඃ
මේ හැම පද වැලක්ම සිය දහස් වාරයක් කියවන්න ඇති මම.ඒ හැම වෙලාවකම මගේ ඇස් කඳුලින් පිරෙනවා.පොත්, මම ආසා කරන තවත් දේ උපන්දිනේට තෑගි විදියට ලැබුනත්, හැම අවුරුද්දෙම මම බලන් ඉන්නෙ අම්මාගෙන් මේ තෑග්ග ලැබෙනකල්. සල්ලි වියදම් කරලා ගන්න කොයි තෑග්ගකටත් වඩා මේ හැඟීම් පිරුන ආදරණීය තෑග්ග මට මහමෙරක් වගේ.......

Thursday, August 23, 2012


අහස් කුස මගෙ නොවෙයි
නිල් සයුර මගෙ නොවෙයි
හමන මදනළ මගෙ නොවෙයි
ඒ නුඹත් මගෙ නොවෙයි

ඒ නමුත්

නුඹ නමින් මා ලියූ කවි පද මගේමයි
නුඹ නමින් මා මැවූ සිහිනයද මගේමයි
නුඹ නමින් එකතු කල ‍මතකයද ම‍ගේමයි
නුඹ නමින් ප්‍රේම කල මේ හිතද ම‍ගේමයි.....

                                                         
ජීවිතේ තරම්ම වටිනවා



මොහොතකට මම ඔයාගෙ ජීවිතේ
ඔයාගෙන් උදුර ගත්තොත්

ඔයාට මොනතරම් දුක හිතේවිද ?
ඒත් ඔයා දුක් වෙනවා 
මට බලන් ඉන්න පුළුවන් වේවිද?
මම නම් දන්නෙ නෑ

හිතා මතා ඔයාගෙ ජීවිතේ
මම ටිකකට නොවෙයි
මුළු ජීවිත කාලෙටම
හොරකම් කරගත්තා කියලා 
ඔයා මට‍‍‍ චෝදනා කරනවද ?

ඔයා ඔයාගෙ ජීවිතේ 
කියලා හිතන් ඉන්නෙ
ඔයාගෙ ආදරේ නම්
අනේ
ඒ ජීවිතේ වෙන්න තරම්
මම වාසනාවන්තද ?

Thursday, August 9, 2012



මං ආදරෙයි

මං ආදරෙයි 
ඔයා මගෙ ළග ඉන්නවා නම්

මං තවත් ආදරෙයි 
ආදරේ කියා දීපු ඔයාගෙ
ලස්සන ඇස් දෙකට

මං ගොඩක් ආදරෙයි....
ආදරේට ආදරේ කරන්න
කියා දීපු ඔය හදවතට

මං මගේ ජීවිතේටත් වඩා ආදරෙයි
මාව ආදරෙන් බලා ගන්න ඔයාට.....


Sunday, August 5, 2012

හිදිමි මග දුර බලන්.........

විටෙක දැනෙනා සුමුදු සිසිලස
හැර යාවි නම් සැනින් වෙන්වී
ගොතන ගෙත්තම් දිවි කතර ගැන
ඵලක් වේවිද කිනම් ලෙසකින්

ලෙලෙන අතු අග පිපුණු මල් ඇත
සුවද විහිදුන් පෙති අරන්
දැවෙන ලෝකෙක නොසැලි ඉමු අපි
කදුළු පොදි බැද ගුලි කරන්

සුපෙම් ලෝකෙක බැදෙන ප්‍රාසද
ස්වප්නයක් ලෙස දැක ඇතත්
සැලෙන නෙතු අග දකින තුරු එය
හිදිමි මග දුර බලන්